تعالوا معايا احكي لكم علي يوم من ايام المدرسه في بيتنا زمان
لما كنا نصحي الساعه حوالي سته علي صوت قرأن الصبح للشيخ محمد رفعت وبعدها تتوالي البرامج زي خمسه رياضه وقطرات الندي .......الخ
واحنا بنلبس انا واختي اللي اصغر مني تكون ماما حضرت الساندوتشات ونحطها فالشنط وتبدء تسرح لنا شعرنا عشان ننزل واجمل قطتين بالفيونكات يتعملوا مع المريله النضيفه والشراب الابيض بالدانيل والجزمه السودا اللي بتلمع
خلاص خلصتوا.... دا صوت بابا
اه خلصنا........
طب يالا عشان منتأخرش
ناخد المصروف نحطه في جيب المريله وننزل مع بابا يودينا المدرسه ويروح هو علي شغله
الجو من بدري كده مغيم وبناخد حصصنا بكل نشاط والفسحه نجري ونلعب وناكل ونكمل اليوم للنهايه يضرب جرس المرواح
ناخد شنطنا ونمشي
بتبتدي تمطر واحنا خارجين من المدرسه نروح نجري ع البيت نلبس
البيجامات الكاستور والروب اللي نفس قماشة البيجامه
وجو البيت شتوي اوي
اللحاف القطن اللي ماما بتطلعه قبل الشتا وتلبسه كسوه علي السراير وشباك البلكون الازاز المقفول والجو بره بيمطر
وانا واختي بنلعب وصوتنا عالي وماما بتزعق وتقول طيب والله لما يجي ابوكوا
واحنا نجري عليها نراضيها ونقولها برعب خلاص والنبي متقوليش ل بابا
بابا راجع الساعه ٣ بالدقيقه من الشغل ولابس البلطو الجلد وغرقان ميه الله يرحمه وفأيده الجرنال وفاكهه او حلويات
وعلي ما يغير لبسه تكون الطبليه اتحطت فالارض وانا واختي بنتناول من ماما احلي محشي سخن بخاره واصل للسقف واخويا الصغير عنده سنه او سنتين بيلعب مع بابا علي السرير
نتلم احنا الخمسه حولين الطبليه بابا الله يرحمه يحكي لماما عن اليوم بره البيت
وماما الله يرحمها تحكي له علي شقاوتنا وازاي تعبناها بكلمه بس واسكتي وشوفي اخوكي وغيره وغيره وغيره
نخلص الغدا وبابا ينام ساعه والساعه دي بيكون كل اليت سكون تام نرمي الابره ترن زي ما كانت ماما بتقول
ولما يصحي بابا يصلي وماما تعمل الشاي يشربوا مع بعض
ويبدء معايا حساب الملكين🥺
قومي يا بنتي هاتي شنطة المدرسه وريني اخدتوا وايه وعملتي ايه
يصحب ذلك بعض المشروبات الساخنه بقي مع نظرات امي وهي فرحانه فيا عشان مقفوشه وبسمع وبحفظ اصلها كانت تحبني اوي 😂😂
وكنت بفضل بابا ومتابعته ليا الاولي علي مدرستي وكتير جدا اتكرمت للتفوق ومازال معايا صور للتكريم دا
وتنتهي رحلة المذاكره عند برنامج حديث الروح نتفرج علي نشرة الساعه تسعه وبعدها
ينطفي التليفزيون والنور اجباري
ويلا نوم بلا مناقشه
اجمل أيام واحلي ذكريات العمر ❤️
ليست هناك تعليقات:
إرسال تعليق